2017 წლის 23 მაისს ფეისბუქ გვერდმა "წინააღმდეგობა მომავლისათვის’’ ვიდეო, სახელწოდებით: "ჯუნგლები თბილისის მეტროში. ამ საქციელს არანაირი გამართლება არ აქვს’’ გაავრცელა. 24 მაისს ფეისბუქ გვერდმა WTF?! Photos იდენტური ვიდეო, სათაურით: "ირანელი, ერაყელი და ინდოელი მიგრანტები თბილისის მეტროში’’ გამოაქვეყნა. აღნიშნულ წყაროზე დაყრდნობით და იდენტური სათაურით ვიდეო ვებ-გვერდებმა dainteresdit.ge, foxnews.ge და ფეისბუქ გვერდმა all ge გამოაქვეყნეს. აღწერილობით ნაწილში აღნიშნული იყო, რომ ვიდეო თბილისის მეტროს ერთ-ერთ ვაგონში ატეხილ ხმაურს ასახავდა, ხოლო მასში მონაწილე აგრესიული მგზავრები ირანელი, ერაყელი და ინდოელი მიგრანტები იყვნენ.


თავდაპირველად იდენტური ვიდეო, სათაურით "რა ხდება თბილისის მეტროში’’ 2015 წლის 7 სექტემბერს ერთ-ერთმა იუთუბ მომხმარებელმა გაავრცელა. არც ვიდეოს სათაურსა და არც მის თანმხლებ ტექსტში მგზავრების ეროვნება მითითებული არ ყოფილა. უფრო მეტიც, კადრები დაბლარულია და მასზე რთულია ადამიანების ეროვნების იდენტიფიცირება, ამდენად აღნიშნული ვებ-გვერდების მიერ ვიდეოსთვის დართული სათაური მანიპულაციურია.