Անհատական տվյալներ են համարվում այն տվյալները, որոնց միջոցով հնարավոր է նույնականացնել անձին: Օրինակ՝

• Անուն-ազգանուն 
• Անհատական համար
• Լուսանկար
• Տեսանյութ
• Մատնահետք
• Հասցե
• Գտնվելու վայր
• Հեռախոսի համար
• IP հասցե

Վերոնշյալ ցանկը սպառիչ չէ և կարող է համալրվել: Ինչևէ, ստորև ներկայացվում են անհատական համարվող հիմնական տվյալները.

Անուն-ազգանունն անհատական տվյալ է, որն ունի յուրաքանչյուր անձ ծնվելու պահից: Ինչևէ, կարող են լինել նույն անուն-ազգանունն ունեցող բազմաթիվ մարդիկ, ինչի հետևանքով այս տվյալը կարող է բավարար չլինել անձին նույնականացնելու համար: 

Անհատական համարը նույնպես տրվում է անձին վերջինիս ծնունդի փաստը գրանցելու ժամանակ: Այն թվերի եզակի, չկրկնվող համադրություն է: Անհատական համարի միջոցով հնարավոր է անձի մասին մեծ թվով տեղեկատվություն ստանալ, օրինակ՝ անձի հասցեն կամ վերջինիս սեփականության իրավունքով պատկանող գույքի մասին տեղեկատվություն: 

Լուսանկարը կամ մատնահետքն, ի տարբերություն անուն-ազգանվան, եզակի են, կրկնվող չեն, և հնարավորություն են տալիս նույնականացնել անձին 100 տոկոս ճշգրտությամբ: 

Տեսանյութը, ինչպես և սելֆին, դարձել է մեր առօրյա կյանքի մի մասը: Մարդիկ տեսանկարահանում են իրենց կյանքի կարևոր, հետաքրքիր կամ զվարճալի պահերը և շտապում տարածել այդ տեսանյութերը սոցիալական ցանցերում: Բայց նրանք, հիմնականում, տեղեկացված չեն, որ տեսանյութը անհատական տվյալ է, և բացի անձի ֆիզիկական տվյալներից (արտաքինից) պարունակում է բազում այլ տեղեկատվություն անձի հմտությունների, շարժուձևի, ժեստերի, վարքագծի եւ այլ հատկանիշների մասին: 

Հասցեն անհատական տվյալ է, որը հնարավորություն է տալիս պարզել անձի ապրելու վայրը: Այն օգտագործվում է անձի հետ կապ հաստատելու, նրան նամակ կամ ծանրոց ուղարկելու համար: Երբեմն անձի գրանցման և փաստացի բնակության հասցեները չեն համընկնում: 

Սմարթֆոնները և տարբեր հեռախոսային ծրագրեր հաճախ տեղեկություն են պահանջում անձի գտնվելու վայրի մասին: Լինում են դեպքեր, երբ մենք ինքներս ենք տարածում այս տեղեկությունները սոցիալական ցանցերում առանց նույնիսկ գիտակցելու, որ մեր գտնվելու կոնկրետ վայրը նշելով՝ անհատական տվյալ ենք բացահայտում: Անձի գտնվելու վայրի ուսումնասիրությունը կարող է անձի վերաբերյալ մեծ թվով, այդ թվում՝ ժամանակի կոնկրետ պահին անձի գտնվելու վայրի և երթուղու մասին տեղեկատվություն տալ: 

Դժվար է հեռախոս, հետևաբար նաև հեռախոսի համար չունեցող մարդ գտնել մեր օրերում, ինչը, ճիշտ անձի անվան և հասցեի պես, անհատական տվյալ է: 

IP հասցե. Անհատական տվյալները եւ համացանցը անքակտելի հասկացություններ են դարձել: Համացանցի ցանկացած օգտատեր ունի ինտերնետ ծառայություններ մատուցողի կողմից իրեն տրված եզակի IP հասցե, որը ոչ միայն հնարավորություն է տալիս պարզել անձի ինքնությունն ու հասցեն, այլ նաեւ նրա գտնվելու ճշգրիտ վայրը:

Անհատական տվյալները մասնավոր եւ պետական կազմակերպությունների համար անգնահատելի հարստություն են: Անհատական տվյալները համարվում են «21-րդ դարի նավթ», քանի որ արդի տեխնոլոգիաները անձնական տվյալները օգտագործում են որպես վառելիք `սպառողներին արագ, արդյունավետ եւ շահութաբեր ծառայություններ մատուցելու համար: Օրինակ, բանկերը օգտագործում են անհատական տվյալները վարկեր տրամադրելու, մարքեթինգային ընկերությունները թիրախային գովազդներ տեղադրելու համար: Որոշ դեպքերում անհնար է առանց անհատական տվյալների օգտվել ծառայություններից: Օրինակ՝ մենք չենք կարող ստանալ նույնականացման քարտ առանց լուսանկար ներկայացնելու:

Հսկայական ծավալով տվյալներ են հավաքագրվում եւ օգտագործվում պետության կողմից: Պետությանը ձեր տվյալները պետք են այնքան, որքան կազմակերպություններին: Օրինակ, հանցագործությունը բացահայտելու համար հետաքննող մարմինը դատարանի թույլտվությամբ կարող է մասնավոր հեռախոսային խոսակցություն գաղտնալսել:

Որքան ավելի շատ տվյալների է տիրապետում պետությունը կամ մասնավոր կազմակերպությունը, այնքան ավելի մեծ է այդ տվյալները չարաշահելու վտանգը: Օրինակ՝ իր իսկ շահույթը մեծացնելու նպատակով կազմակերպությունը կարող է ավելի շատ տվյալներ օգտագործել, քան անհրաժեշտ է ծառայություններ մատուցելու համար, կամ այն կարող է վաճառել մեր տվյալները, օրինակ՝ հեռախոսահամարների շտեմարանը, իր գործընկերոջն առանց մեր համաձայնության: Պետությունն էլ բացառություն չէ տվյալների չարաշահման հարցում: Առավել քան հնարավոր է, որ հետաքննության մարմինը կիրառի հավաքագրված տվյալները անձի դեմ:

Միայն պետությունը և առևտրային ընկերությունները չեն, որ չարաշահում են անհատական տվյալները: Հաքերներ, կեղծարարներ, սթալքերներ և դոքսերներ. ահավասիք, ոչ սպառիչ ցանկը անձանց այն շրջանակի, որոնք անհատական տվյալներ են «որսում»՝ ֆինանսական, անձնական կամ քաղաքական շահերի համար (մանրամասները՝ կիբերանվտանգությանը վերաբերող հատվածում):

Ամեն դեպքում, անհատական տվյալների անօրինական բացահայտումը կամ օգտագործումը կարող է ֆինանսական, ինչպես նաեւ բարոյական վնաս պատճառել: Միեւնույն ժամանակ հարկ է նշել, որ հաճախ մենք ինքներս ենք խախտում մեր գաղտնիությունն ամեն անգամ, երբ առանց մտածելու տարածում ենք մեր տվյալները սոցիալական ցանցերում` բացահայտելով դրանք անծանոթներին:

Մարդու իրավունքների և համընդհանուր ազատությունների պաշտպանության մասին Եվրոպական կոնվենցիայի համաձայն՝ անհատական տվյալները համարվում են անձի մասնավոր կյանքի մի մաս, իսկ տվյալների գաղտնիության պահպանումը ճանաչվում է մարդու հիմնարար իրավունք: Կոնվենցիայի 8-րդ հոդվածի համաձայն՝ պետությունը պետք է հարգի անձի մասնավոր կյանքի անձեռնմխելիության իրավունքը և ապահովի նրա մասին ունեցած ցանկացած տեղեկության պաշտպանությունը:
Պետության միջամտությունն այս իրավունքին անընդունելի է, բացառությամբ այն դեպքերի, երբ այդ միջամտությունը՝

• Նախատեսված է օրենքով
• Հետապնդում է իրավաչափ նպատակ
• Անհրաժեշտ է ժողովրդավարական հասարակությունում
• Համաչափ է

Վրաստանի Սահմանադրությունը ճանաչում է անձի մասնավոր կյանքի անձեռնմխելիության իրավունքը:

“«Յուրաքանչյուր անձի անձնական կյանքը, տունը, անձնական փաստաթղթերը, նամակագրությունը, հեռախոսային եւ այլ տեխնիկական միջոցներով կատարված հաղորդակցությունը, այդ թվում` տեխնիկական միջոցներով ստացված հաղորդագրությունները, անձեռնմխելի են»”. Սահմանադրության 20-րդ հոդված:

Ավելին, Սահմանադրության 41-րդ հոդվածի համաձայն՝ անձի առողջության, ֆինանսական միջոցների կամ այլ անձնական հարցերի վերաբերյալ պաշտոնական գրառումներում պարունակող տեղեկությունները չեն կարող բացահայտվել որևէ երրորդ անձի:
Հետևաբար, անհատական տվյալները հրապարակային տեղեկատվություն չեն: Պետական մարմինները, ինչպես նաև առևտրային կազմակերպությունները պարտավոր են պահպանել հետևյալ տվյալների գաղտնիությունը.

• Անձի ինքնությունը
• Հասցեն
• Ախտորոշումը
• Բանկային հաշվի համարը

Ցանկացած այլ տվյալ, որով հնարավոր կլինի նույնականացնել անձին: 

“Վրաստանի Անհատական տվյալների պաշտպանության մասին օրենքի համաձայն՝ տեղեկատվության հետևյալ տարատեսակները պետք է ենթակա լինեն հատուկ պաշտպանության՝

• Ռասա և էթնիկ ծագում
• Քաղաքական հայացքներ
• Կրոնական և փիլիսոփայական դավանանք
• Առողջական կարգավիճակ
• Սեռական կյանք
• Տվյալներ դատվածության մասին
• Տվյալներ ձերբակալությունների մասին
• Քրեական վարույթում դատախազի և մեղադրյալի միջև կնքված համաձայնագրի մասին տվյալներ
• Կենսաչափական և ծագումնաբանական տվյալներ

Առանց անձի համաձայնության նշված տվյալների հանրայնացումն անթույլատրելի է՝ որոշ բացառություններով:

Անհատական տվյալները միշտ չէ, որ գաղտնի են և օրենքով նախատեսված մի շարք դեպքերում որոշակի կոնկրետ տեղեկություններ կարող են հանրայնացվել: Նման բացառություններ կարող են արվել հետևյալ դեպքերում.

• Դատարանի թույլտվությամբ
• Ծայրահեղ անհրաժեշտության դեպքում, օրենքի համաձայն
• Եթե առկա է հանրային շահ

Դատարանի թույլտվություն. Վրաստանի Սահմանադրության համաձայն՝ անձի մասնավոր կյանքի, անձնական փաստաթղթերի և նամակագրության, հաղորդագրությունների վերաբերյալ տեղեկատվություն ստանալ կամ անձի հեռախոսային խոսակցությունները գաղտնալսել կարելի է միայն դատարանի թույլտվության հիման վրա: Օրինակ՝ եթե հանձագործությունը բացահայտելու համար ոստիկանությանը պետք է անձի բանկային հաշվի վերաբերյալ տեղեկատվություն, այն նախքան բանկից այդ տեղեկատվությունը ստանալը պետք է դիմի դատարանին՝ համապատասխան թույլտվություն տալու խնդրանքով:  

Ծայրահեղ անհրաժեշտություն՝ օրենքի համաձայն. Երբ հանցագործության բացահայտման համար անհրաժեշտ տեղեկատվության ոչնչացման ռիսկի առկայության պատճառով հնարավոր չէ դատարանի թույլտվություն ստանալ, թույլատրվում է ստանալ այս տեղեկատվությունն առանց դատարանի թույլտվության՝ ծայրահեղ անհրաժեշտության հիմքով: Ինչևէ, հետագայում նախաքննության մարմինը պետք է դատարանում ապացուցի, որ այս միջոցի կիրառումն իսկապես անհրաժեշտ է եղել: 

Հանրային շահ. Վրաստանի Խոսքի և արտահայտման ազատության մասին օրենքը սահմանում է.

«Հանրության շահը (և ոչ առանձին անհատների հետաքրքրասիրությունը) ժողովրդավարական հասարակությունում հանրության ինքնակառավարման իրացումն է»:

Անհատական տվյալներ հանրայնացնելու դեպքում պետական և մասնավոր հաստատությունները, ինչպես նաև լրատվամիջոցները պետք է հանրային շահի և տվյալների պաշտպանության միջև հավասարակշռություն պահպանեն: Հավասարակշռության պահպանան հարցը պետք է յուրաքանչյուր դեպքի համար որոշվի առանձին: Հանրային և և մասնավոր շահի միջև հավասարակշռություն ապահովելու գործում նախապատվությունը պետք է տրվի հանրային շահին միայն այն դեպքում, երբ տվյալների բացահայտման կարևորությունը գերազանցում է անձին իր անհատական տվյալները բացահայտելու հետևանքով պատճառած վնասը: Օրինակ՝ եթե բարձրաստիճան պաշտոնյան չարաշահում է իր պաշտոնեական դիրքը իր երեխայի կողմից կատարված հանցագործությունը կոծկելու համար, հանրային գերակա շահը պահանջում է, որ բարձրաստիճան պաշտոնյայի կողմից արված չարաշահումների մասին տեղեկությունները հանրայնացվեն: 

Տվյալների բացահայտման այլ դեպքեր

Վրաստանի Անհատական տվյալների պաշտպանության մասին օրենքի համաձայն՝ տվյալները, բացառությամբ հատուկ կատեգորիայի տվյալների, կարող են բացահայտվել միայն հետևյալ դեպքերում.

• Անձի համաձայնության դեպքում
• Եթե տվյալների բացահայտումը նախատեսված է օրենքով
• Եթե տվյալների բացահայտումն անհրաժեշտ է կազմակերպության կանոնադրական պարտավորությունները կատարելու համար
• Եթե տվյալների բացահայտումն ահնրաժեշտ է անձի կենսական շահերն ապահովելու համար
• Եթե տվյալների բացահայտումն անհրաժեշտ է կազմակերպության կամ մեկ այլ անձի օրինական շահերը պաշտպանելու համար
• Եթե տվյալները հրապարակային են
• Եթե տվյալների բացահայտումն անհրաժեշտ է անձի դիմումը բավարարելու կամ ծառայություններ մատուցելու համար:

• Տվյալների հասանելիության և դրանց պատճենը ստանալու իրավունք
• Տվյալների ճշգրտման իրավունք
• Տվյալներն օգտագործելուն առարկելու իրավունք
• Տվյալների ոչնչացման իրավունք

Տվյալների հասանելիության և դրանց պատճենը ստանալու իրավունք. Յուրաքանչյուր անձ իրավունք ունի իմանալ, թե ինչ տեղեկատվություն է հավաքվում նրա մասին պետության եւ առեւտրային կազմակերպությունների կողմից: Եթե խոսքը գնում է պետական մարմնի մասին, ապա անձն իրավունք ունի պահանջելու այդ տվյալներին հասանելիություն եւ դրանց պատճենն անվճար ստանալու հնարավորություն:

Շտկման իրավունք. Եթե գտնում եք, որ կոնկրետ կազմակերպությունը հավաքագրում է Ձեզ վերաբերող կեղծ կամ սխալ տվյալներ, իրավունք ունեք պահանջելու այդ տվյալների շտկում:

Տվյալների օգտագործման դեմ առարկելու իրավունք. Եթե Դուf այլևս չեք ուզում, որ կազմակերպությունն օգտագործի Ձեր անհատական տվյալները իր նպատակների համար (օրինակ՝ Ձեզ գովազդ ուղարկելու համար), Դուք իրավունք ունեք առարկելու Ձեր անհատական տվյալների մշակման և օգտագործման դեմ: Եթե Ձեր պահանջը չի կատարվում, կարող եք բողոք ներկայացնել Անհատական տվյալների պաշտպանության տեսուչին:

Տվյալները ջնջելու իրավունք. Եթե պահանջը կատարվում է եւ կազմակերպությունը դադարեցնում է մշակել մեր տվյալները, կարող ենք պահանջել ջնջել դրանք:

Եզրակացություն. նախքան մեր տվյալները որևէ կազմակերպությանը կամ անծանոթին ներկայացնելը միշտ պետք է հարցնենք.

• Ի՞նչ նպատակով են օգտագործվում մեր տվյալները:
• Կփոխանցե՞ն արդյոք նրանք մեր տվյալները երրորդ կողմին առանց մեր համաձայնության:
  
  

Հեռարձակողների վարքագծի կանոնագրքի 10-րդ գլուխը սահմանում է կանոններ, որոնք պետք է պահպանվեն հեռարձակողների կողմից անհատական տվյալների առնչությամբ: Մասնավորապես, բացառությամբ այն դեպքերի, երբ առկա է հանրային շահ, հեռարձակողը չպետք է հանրայնացնի անձի վերաբերյալ հետևյալ տեղեկությունները.

• Հաշվառման վայր
• Հեռախոսահամար
• Հասցե
• Այլ անձնական կոնտակտային տվյալներ:

Լրագրողի կողմից առանց անձի համաձայնության, նրա անձնական կյանքի գաղտնիության իրավունքի խախտմամբ ձեռք բերված տեղեկությունները համարվում են անհատական տվյալներ, բացառությամբ այն դեպքերի, երբ հանրային շահն ավելի գերակա է, քան մասնավոր տեղեկատվությունը պաշտպանելու պարտավորությունը:

Կանոնագրքի 10-րդ գլուխը մանրամասն ներկայացնում է այն կանոնները, որոնք պետք է պահպանվեն լրագրողների կողմից իրադարձությունների լուսաբանման ժամանակ: Այս կանոնները վերաբերում են.

• Հանրային վայրերում արված անհատական տվյալներ պարունակող պատկերների օգտագործմանը
• Դպրոցներում, պետական և մասնավոր հաստատությունների տարածքում արված պատկերների օգտագործմանը
• Հեռախոսային խոսակցության ձայնագրության օգտագործմանը
• Մահացած անձանց և վթարների կամ բռնության զոհերի նույնականացմանը
• Երեխաների նույնականացմանը
• Կասկածյալի նույնականացմանը
• Սեռական բռնության զոհի նույնականացմանը:

անրային վայրերում արված պատկերները. Հեռարձակողը պետք է հավաստիանա, որ հանրային վայրում արված պատկերները, բառերը կամ գործողությունները բավականաչափ անձնական չեն, որ դրանց հրապարակման համար պահանջվի պատկերում ներգրավված անձի նախնական համաձայնությունը:

Դպրոցներում, պետական և մասնավոր հաստատությունների տարածքում արված պատկերները. Հեռարձակողների վարքագծի կանոնակարգի 35-րդ հոդվածի համաձայն՝ դպրոցներում, պետական և մասնավոր կազմակերպություններում, այդ թվում՝ հիվանդանոցներում, վերականգնողական կենտրոններում և ոստիկանությունում, տեսանկարահանում կամ ձայնագրառում կարելի է անել միայն համապատասխան լիազորված անձի թույլտվությամբ: Նախնական համաձայնություն չի պահանջվում այն դեպքում, երբ տեսանյութում հայտնված անձին հնարավոր չէ նույնականացնել: Օրինակ՝ եթե հիվանդանոցում տեսանկարահանում է արվել հիվանդանոցի ադմինիստրացիայի թույլտվությամբ, բայց տեսանյութում հայտնված հիվանդին հնարավոր է նույնականացնել, ապա այս դեպքում լրատվամիջոցը բացահայտում է այս անձի առողջությանն առնչվող տվյալներ:

Հեռախոսային խոսակցության ձայնագրության օգտագործումը. Նախքան զրուցակցի հետ հեռախոսային խոսակցությունը ձայնագրելը, հեռարձակողը պետք է ներկայանա, ներկայացնի զանգի նպատակը, ինչպես նաև տեղեկացնի, որ խոսակցությունը ձայնագրվում է հնարավոր հեռարձակման համար: Լրագրողը պետք է ստանա զրուցակցի համաձայնությունը նախքան ձայնագրությունը հրապարակելը: 

Մահացած անձի, վթարի կամ բռնության զոհի նույնականացումը. Մահացած անձի, վթարի կամ բռնության զոհի պատկերը պետք է տեսանկարահանվի որոշ հեռավորությունից, այնպես, որ հնարավոր չլինի նրանց նույնականացնել: 

Երեխայի նույնականացումը. Հեռարձակողը չպետք է օգտագործի երեխայի պատկերը կոնկրետ խնդիր պատկերող տեսանյությում և պետք է քողարկի երեխայի դեմքը (օրինակ ծածկի քառակուսիներով): Երեխայի նույնականացումն անթույլատրելի է, եթե տեսանյութը վերաբերում է հետևյալին:

• Երեխայի կողմից գործած հանցագործությանը, և երեխան ունի կասկածյալի, մեղադրյալի կամ դատապարտյալի կարգավիճակ, կամ ներգրավված է գործում որպես վկա կամ տուժող
• Սեռական բնույթի հանցագործությանը, և երեխան կասկածվում է այդ հանցագործությունը կատարելու հարցում կամ սեռական բռնության զոհ է:

Կասկածյալի նույնականացումը. Հեռարձակողը չպետք է բացահայտի կասկածյալի ինքնությունը, եթե կասկածյալի անունը հայտնի չէ հանրությանը կամ եթե գործի բացահայտման հարցում առկա չէ հանրային շահ: 

Սեռական բռնության զոհի նույնականացումը. Հեռարձակողը չպետք է բացահայտի սեռական բռնության զոհի ինքնությունը, եթե վերջինս չի տալիս իր համաձայնությունը ու եթե առկա չէ հանրային շահ: 

Նշված բոլոր դեպքերում անձի անհատական տվյալներն օգտագործելու արգելքի հարցում կարելի է բացառություն անել, եթե առկա է հանրային գերակա շահ, և հանրության իրավաչափ շահը գերակշռում է:

Եթե մեր անհատական տվյալների գաղտնիությունը խախտվել է, կարող ենք դիմել՝

• Անհատական տվյալների պաշտպանության տեսուչին
• Ոստիկանություն
• Լրատվամիջոցների ինքնակարգավորվող մարմին (տես համապատասխան գլուխը)
• Եթե տվյալների գաղտնիությունը խախտվել է սոցիալական ցանցերում, ապա համապատասխան սոցիալական ցանցին:

Անհատական տվյալների պաշտպանության տեսուչը. Մենք կարող ենք դիմել տեսուչին այն դեպքում, երբ մեր իրավունքները խախտվում են առևտրային կազմակերպությունների, պետական կառավարման մարմինների կամ անհատների կողմից:  

Տեսուչը պատասխանատու է տվյալների պաշտպանությանն առնչվող խախտումների վերաբերյալ հարցումներ անելու եւ դրանց պատասխանելու համար: Նա քննում է քաղաքացիների բողոքները, եւ խախտումներ հայտնաբերելու դեպքում պահանջում է կազմակերպությանը խախտումները վերացնել, իսկ անհրաժեշտության դեպքում սահմանում է տուգանք: 

Ոստիկանությունը. Անհատական տվյալների անօրինական հավաքագրումը, պահումը, օգտագործումը կամ տարածումը քրեական հանցագործություն է: Օրինակ, եթե անձը ներբեռնել է ձեր անձնական տեսանյութը ձեր համակարգչից առանց թույլտվության և տարածել այն սոցիալական ցանցերում, պետք է դիմել ոստիկանությանը: Ձեր հաղորդման հիման վրա ոստիկանությունը հետաքննություն կսկսի:

Լրատվամիջոցների ինքնակարգավորող մարմին. Եթե լրատվամիջոցը բացահայտում է Ձեր անհատական տվյալները առանց թույլտվության և այդ հարցում առկա չէ հանրային շահ, դուք կարող եք դիմել Հեռարձակողների բողոքների քննության հանձնաժողով: Ինչ վերաբերում է լրատվամիջոցների այլ տեսակներին, կարող եք կիրառել Լրագրողական էթիկայի խարտիան:

Սոցիալական ցանցեր. Եթե անձը վերբեռնում է ձեր լուսանկարը սոցիալական ցանցերում կամ դարձնում է այն իր էջի հիմնական նկար, կարող եք դիմել սոցիալական կայքին և պահանջել, որպեսզի այդ նկարը ջնջվի:

Եթե նշվածը տեղի է ունենում Ֆեյսբուքում, սեղմեք հետևյալ ակտիվ հղումը՝ նշեք այն նյութը, որը պետք է հեռացվի, նշեք նյութի URL հասցեն և ուղարկեք հաղորդագրությունը: Ֆեյսբուքը նաև հնարավորություն է ընձեռում բողոքել կոնկրետ օգտատիրոջ դեմ, որը տարածել է Ձեր լուսանկարը կամ տեսանյութը: Մտեք այդ անձի անձնական էջ, սեղմեք օգտատիրոջ հետնանկարի ներքի աջ անկյունում գտնվողնշանի վրա, այնուհետ սեղմեք «Արձագանքել» (“give feedback”) կամ «բողոքել այս էջի դեմ» (“report this profile”), ապա հետևել հրահանգներին: 

Եթե նշվածը տեղի է ունենում Ինստագրամում, սեղմեք հետևյալ ակտիվ հղումը՝ պատասխանեք մի քանի պարտադիր հարցերի, նշեք խնդրո առարկա նյութի URl հասցեն և բողոք ներկայացրեք:.

Եթե նշվածը տեղի է ունենում Յություբում (Youtube), սեղմեք հետևյալ ակտիվ հղումը՝ և լրացրեք անհրաժեշտ տեղեկությունները համապատասխան դաշտերում:

Հնարավոր չէ կանխատեսել, թե արդյոք անցանկալի նյութը կջնջվի սոցիալական ցանցից Ձեր բողոքի հիման վրա: Կազմակերպությունները մեզ նախապես զգուշացնում են, որ բողոքը կարող է չբավարարվել, եթե պահանջն անհիմն է: Հետևաբար, որքան հստակ է մեր կողմից ներկայացվող տեղեկատվությունը, այնքան մեծ է հավանականությունը, որ մեր պահանջը կկատարվի: